Para sa aking Mahal na Magulang

Image
By: Eden Diao Apostol

Ang buhay kong ito'y sa inyo nagmula Pangalawa sa Diyos na s'yang lumikha Utang ko sa inyo ang aking hininga Minahal, hinubog ng inyong kalinga. Mga sakripisyo'y sadyang hindi biro Mula ng ako'y iniluwal sa mundo Pag-ibig na iniukol sa 'ki'y totoo Pagmamahal ninyo'y nagsilbing lakas ko. Ako'y tinuruan ng magandang asal Sa gitna ng hirap ako'y pinag-aral Upang 'di mapariwara ang aking buhay Diplomang natanggap sa inyo ini-alay. Ngayon ang buhay ko ay sadyang kay-palad Pangarap ko'y unti-unting natutupad Ito'y bunga ng 'nyong dakilang paglingap Sa 'king puso'y walang hanggang pasalamat.

Pangako ng Isang Ina (Mga Inang OFW)

Likha at Handog ni: Rey Medalla

sa bansang sinilangan 'di matupad
pangarap kamtin dito sa mga palad
pilit man na abutin ganda ng bukas
sa puso ay mithiin na iaalay sa anak

kahit anong sikap kaniyang gawain
ang asam sa puso'y hindi kakamtin
kay ilap hawakan perang gugugulin
una sa maghapon ay itong pag-kain

paano ang edukasyon ay maibibigay
dito sa anak niya magiging sandigan
sapat na bang kumain sa araw-araw?
paanong haharap sa dagok ng buhay

kaya nag-pasya ang anak ay lisanin
tutol man ang kalooban ito ay titiisin
taghoy sa sarili na lipos ng panimdim
Diyos ko ako'y gabayan pag-palain

Ina ay lumisan bunsod ng pangarap
ialay sa supling ay mga tuwa at galak
lahat ay babathin maging anong hirap
taglay sa puso pangakong kay tatag

habang sinakyan ay tuluyang lumayo
hilam ang mga matang luha'y tumulo
nagsikip ang dibdib wari'y nagdurogo
magbabalik ako, ito ay aking pangako

bansa na tinungo ng Ina ay dumating
malupit niyang amo ng siya'y harapin
mata'y nanlilisik sa kanya nakatingin
na wari ay hayok gusto siyang kainin

siya ay nasindak, pumasok sa isipan
gutom sa laman ang among nadatnan
asawang babae matandang hukloban
kaya siya ngayon ang pagbabalingan

sa araw- gabi batid niyang nakaharap
buwitre na gutom sa kanya'y lalantak
laging nasa isip, sa dilim masasadlak
paano na kaya ang mahal niyang anak?

nangyari ang nangyari hindi nakaligtas
isang gabi noon ang Ina ay dinahas
nanlaban ang Ina sipa at mga tadyak
nagdilim ang lalake at siya'y sinaksak

habol ang hininga kaniyang naramdaman
duguang katawan ito ay nilapastangan
maawa po kayo anak ko'y naghihintay
pangako ko sa kanya siya'y babalikan

ng kanyang bitiwan ang huling hininga
anak ko ang pangako'y babalikan kita
sa ating tahana'y muling magkasama
pangako ng ina sa anak niyang sinta

ilang Ina pa kaya sawi ang kapalaran?
dahil sa anak ay napilitan na lumisan
ilang Ina pa kaya, may pangakong binitiwan?
babalik na muli wala na siyang buhay?

Comments

Popular posts from this blog

Para sa aking Mahal na Magulang

Siya na Aking Ina

Lumipad at Mangarap