Mga Tula ng Buhay at Pag-ibig ATBP

OFW lang Po, Hindi kami Bangko

2011-04-26T11:18:00.000-07:00

Mala-sutlang kutis, sapatos na makinis
damit na may bayawak, iPad ang hawak
ang sarap ng abroad, ang laki ng sahod
iyan ang nakikita, yan ang maling akala
ang di nila alam, wallet ay walang laman
sahod ay kapos, muntikan pang mamalimos

Padala sa Pinas, walang tira lahat'y waldas
kapag nahuli ng konti, ikaw pa ang mag-sosori
text si pamangkin, sarap namang ika'y kumustahin
kasunod na mensahe, pera din, dami pang pasakalye
si bunso bida sa barkada, pang-inom siya ang taya
pangmatrikula sa eskwela, bahala lagi si kuya

O si kuya pala, kakapanganak lang ng asawa
ninong ka nga di ba? ikaw ang nakatoka sa handa
si nanay ito, salamat anak,may TV akong bago
padala ka lang agad, para sa kuryente, pambayad
nadalaw tito mo, sapatos daw sana pag-uwi mo
pare mo nagpapasabi, para sa inaanak, pang-Jollibee

Kaysarap talagang magbigay, sa pamilya'y umalalay
ang hiling lang naman, pang-unawa'y nyo'y lawakan
di sa lahat ng pagkakataon, kami'y maging takbuhan
pera'y di pinupulot lamang, pawis at luha ang puhunan
wag naman sanang magdamdam, gusto lang sa inyo'y ipaalam
kami rin naman, may pangangailangan na dapat tustusan

Kung Ako si Charice

2011-01-18T06:15:00.000-08:00

Kung ako si charice heto ang aking mga tanong
Nasaan kayo ng panahong akoy’ isang hamak pa lang?
Bakit ngayon pansinin ko kayo, akin pang obligasyon?
Akin lang namang hiling pang-unawa ninyo’y lawakan

Kung ako si Charice di ko kailangang magpaliwanag
Sabihan man nila na ako ay nakalimot na
Dahil wala akong maisip na ginawa nila para ko tandaan
Magmalaki, nasa akin ang lahat ng karapatan

Kung ako si Charice ako ang manunumbat
Ano na kayang karangalan sa bansa inyong naibigay?
Dapat bang ang sambayanan sa inyo’y magpasalamat
Di kaya mas magandang tulungan nyo pa akong umangat

Kung ako si Charice sobra akong magdaramdam
Dahil kahit saan “Pilipino ako” aking pinangangalandakan
At heto pa ang aking matatanggap na kabayaran
Pilipino tayo, isang bansa, dapat magdamayan

Kung ako si Charice sa Japan na ako maninirahan
Mahal at nirerespeto ako, di man nila ako kababayan
Sa kanila tunay na pagpapahalaga aking nasumpungan
Ang sakit sa loob na ika’y saktan sa sariling bakuran

Iyan ay kung ako si Charice pero kaka-iba siya
Kababaan ng loob niyang taglay ay kahanga-hanga
Di siya mapagtanim ng galit kaya siya pinagpapala
Kaya sana imbes na siraan, ipagmalaki siya ng buong bansa
Lalo na ng mga sinasabing mamamahayag ng katotohanan

Sa Panaginip na Lamang

2010-11-28T12:44:00.000-08:00

Kay gandang pakinggan
Huni ng mga ibon
Dama ko ang kapayapaan
Isip ay walang agam-agam

Sa wari ko ay paraiso
Tilamsik ng tubig sa talon
Pagsilip ng araw sa mga dahon
Mapag-anyayang balon

Sariwang hangin na dumadantay
Tunog ng tubig na dumadaloy
Sa ilog, o kay sarap lumangoy
Sabay sa agos na kay lumanay

Payapang nilalang na nakataghoy
Nakakubli sa mga punong-kahoy
Sa bawat hakbang, aking naamoy
Halimuyak ng mga blulaklak na ligaw

Sa aking pag-gising, panghihinayang
Dahil kailanman din na mararanasan
Mga masasayang araw na nagdaan
Nang kaulayaw pa ang inang kalikasan

Di Ka Nag-Iisa

2010-11-18T12:19:00.000-08:00

Nasa madilim na sulok, nagtatanong
nakaluhod at mag-isang umiiyak
kalaguyo ay mga maitim na anino
nagdadalamhati sa pangarap na nawasak

Sana nga ay may mga sagot
mga tanong na gumugulo sa isipan
katinuan sana ay huwag malagot
makita mo sana ang tamang daan

Kaibigan iyong iwaglit ang poot
piliting muling makabangon
tumingin ka sa malawak na laot
maghintay, darating ang ambon

Kasawian ay bahagi ng buhay
huwag mong isiping nag-iisa ka
dahil ano't ano pa man, may dadamay
kaantabay nagmamahal na pamilya

PAG-IBIG AT PAKIKIBAKA ‘kay KASAMA

2010-11-09T00:23:00.000-08:00

may mga pandamang
pilit sa sarili'y kumakalas,
dahil, marahil and damdami'y
may sariling dunong at kusa
sinusuong, katunggali man niya'y
panahon.

panahon, na sa sarili ma'y kumakalas din,
naglalakbay ng kusa,
dahil walang nilalang ang
sa kanya'y magdidikta,
kahit pa ang gahiganteng kamay na bakal.

At kagaya ng pandama
na inialay ko sa'yo,
pilit ko mang ikahon ay
kusang kumakalas,
sumasabay sa bawat paghakbang
ng mga adhikaing lumaya...

bagama't,
hatid nito sa aki'y
panibagong kaisipan.
Hindi nang aking sarili,
kundi'y higit pa sa layuning
siya ay paglingkuran.

ito na marahil ang pandamang
pilit kong hahawakan,
dugo man sa alon ay
iindayog...

magpapatianod sa kaway
ng walang hanggang pagmamahal,

sa iyo, at
sa Bayan.

Katha at Hambag ni: Karen Joy

Sa Aking Pag-iisa

2010-11-06T01:33:00.000-07:00

Sa aking pag-iisa dito sa kabina
Oras at panahon di ko alintana
Nag-iisip, nagninilay, damdami’y umaapaw
Gumagawa ng salaysay base sa aking buhay

Bakit ko sasayangin oras na binigay sa akin
Talento’y gagamitin tula ko’y pagyayamanin
Sa loob at labas ng barkong naglalayag
Mga bagay na kapansin-pansin aking tutulain

Oo nga’t mahirap t’yaga lang ang katapat
Di mo mapapansin matatapos mo na rin
Mag-iisip ng mga salitang, magtutugma’t mag ra-rhyme
Magandang pakinggan, baybayin mo’t kay inam

Ng aking sinimulan sa Qatar na aking pinanggalingan
Natuto sa grupong mahal kong Buhay Qatar
Si Kiko’ng aking kaibigan na taga Bulacan
Nahamong makipagtalastasan sa kanyang balagtasan

Muli kong naalala mga tropang nakasama
Naging kapaki-pakinabang ang masayang samahan
Si Pinoy na nanguna pinagtagpo’t pinagsama
Kaya’t di mo kalilimutan kahit ikaw ay lumisan

Mga ala-alang nagdaan, bakit di ko makalimutan
Maiiyak lamang, pati damdamin ko’y masasaktan
Ito nga ba talaga ang bunga ng pag-iisa
Sa malayong lugar, malayo sa pamilya

Mahaba-haba na at ayoko ng dugtungan pa
Itong tulang ngayon ko lang naipapadama
Marami pang naghihintay sa mga mambabasa
Kabanata ng aking buhay sundan nyo na lang sa twina

Written on Nov.5, 2010 at the Security Office while on duty. Encouraged myself to write a poem dedicated to my friends in Qatar especially the Buhay Qatar group organized by Pinoy (Omar dela Cruz). It was Francisco Morilao (Kiko) who started his poem in the BQ site and I found out that I am busy in making a poem as challenged to what Kiko is doing. From then on the group started to form a group of writers together including the courageous Spike.

Isinulat at hambag ni: Nepthali Paraiso

Tamis ng Unang Pag-ibig (Ika-2 Yugto)

2010-10-20T12:26:00.000-07:00

Aking mundo na kay pait at kay lumbay
Sa isang iglap napuno ng buhay
Ang paligid ko ay nagkaroon ng kulay
Sa saya naitaas dalawa kong kamay

Kinapa ko aking telepono sa bulsa
Aking tinawagan mahal kong pinsan
Inayang sa linggo kami’y magsimsimba
Kasama ang maganda niyang kaibigan

Umaga ng linggo, sa banyo’y umaawit
Nakalutang dahil sa inaasahang pagkikita
Margarita na aking irog at nilalangit
Akin ng inaasam aming unang pagsasama

Damit ay pinasadaan, pati buhok plantsado
Sapatos na naka-kahon pa, akin ng isinuot
Puso ay parang kumakawala sa dibdib ko
Iniisip pa lang, labis nang ligaya ang dulot

Paglabas ng bahay, noon ko lang napagtanto
Wala nga pala akong gagamiting sasakyan
Hiya’y kinalimutan, takbo ako kay pareng Ambo
Aking pasasalamat at siya’y aking naabutan

Itutuloy....

Palabas Sa Loob

2010-10-14T12:34:00.000-07:00

Hala hayan na at biglang tumutulo
Mga luha sa mata na pang gulo,
Habang pinapanood mga iyakan at away
Sa dramang tinututukan ng walang humpay.

Mas dama mo pa ang init ng palabas
Kesa sa isinusubong kanin at patatas,
Di mo na naririrnig si Junior na umiiyak
Kasi ang TV ay mas maingay yun ang tiyak.

Inday hindi ka pa ba nagsasawa
Sa bawat eksenang kanilang ginagawa,
Na kinopya lamang sa mga dati pang palabas
Paulit ulit at pabalik balik na parang walang wakas.

Drama dito drama doon walang ibang pinanood
Kahit mangapitbahay mapanood lang ng sunod sunod,
Drama dito drama doon mga istasyon palaging ini-ere
Pati si Shaider winasak na parang mumurahing yukulele.

Wala kanang ibang ginawa kundi manood ng drama
Pamilya, kapitbahay pati pusa nadamay at nahawa,
Di pa nakontento pati boratsero niyayang manood
Sige nood kahit nakaupo nakatayo o nakaluhod.

Ngayon pati ikaw naging isang drama
Konting biro lang di kana mapatawa,
Lahat ng bagay siniseryoso ng buong todo
Sa tingin ko'y kailangan mo na ng saklolo.

Kulang na lang korona at pwede kanang tawaging reyna
Ang galing mong magdrama parang totoong eksena,
Ale ikaw ay masyado nang maramdamin
Akala mo buong mundo ay iyong papasanin

Palabas sa loob, utak at damdamin ay nilason
Magpalunas kana't malala na iyong kondisyon,
Buhay mo'y naging katulad ng dramang pinapanood
Iyak ka ng iyak baka nga ikaw na ay malunod.

Katha Ni: TheFlipfloper

Palaisipan

2010-10-13T01:15:00.000-07:00

isang sikat na libangan
dito sa ating tambayan
tara nang sagutan
ang palaisipan

mga simpleng salita
na humahasa sa memorya
mula sa panitikan
hanggang sa pelikula

anim na letra pahalang
sigarilyo ng tikbalang
baka hindi mo pa alam
kung ano ang kabisera ng Guam

kailangang magkatugma
ang isasagot mo pababa
dahil kung hindi tama
malamang ika'y magbura

huwag kang mandaraya
na abangan bukas ang resulta
o kaya naman ay manghula
dahil sagot mo'y mali mali na

itong tula ay alay ko sa mahal kong ina
na palaisipan fanatic mula pagkabata
huwag mo lamang iistorbohin
at baka ika'y sa dyaryo'y hampasin

Katha Ni: Makatang Kiko

Anghel

2010-10-12T11:16:00.000-07:00

Tingin ko sayo noon ay anghel sa langit
Sa akin ika'y lumapit at akoý inakit
Subalit nagulat sapagkat sa pwet ko nakakapit
Nang aking namalayan wala na ang aking wallet

Sa taglay mong ganda ay di nagsasawa
Nilalanghap ang halimuyak sa iyong pagbukaka
Subalit di makapaniwala sa aking nakita
May for-sale na nakasulat sa iyong bukana

Katha Ni: Omar

Tamis ng Unang Pag-ibig

2010-10-11T14:07:00.000-07:00

“Anghel sa lupa”, ang aking nasambit
Nang masilayan ko tamis ng iyong ngiti
Kahit na sandali parang nasilip ko ang langit
Nalimutan ko hinanakit at pagdadalamhati

Panandalian akong napako sa kintatayuan
Pinilit kong ibuka aking mga putlang labi
Para masagot binitawan mong katanungan
Masaklap ako’y natisod at napangiwi

Sa aking pagkapahiya, pinilit kong ngumiti
Pagtingin ko sayo, hagalpak ka sa kakatawa
Naglapat ang ating mga mata sabay bawi
Mayroong parang kung anong kurot na nadama

Iyon na pala ang simula ng mahabang gabi
Dahil sa tuwina ikaw ang pinapapangarap ko
Di ko malimutan hugis puso mong mga labi
Heto na, nangyari na, tuliro yaring puso

Sumunod na mga araw, sa aking pagtatanong
Aking nalaman, dayo ka pala sa aming bayan
Isa o dalawang buwan ika'y magbabakasyon
Nagkataon, kaibigan mo pala aking pinsan

Ikalawang Yugto

PANAGINIP (By: Liberty Hipolito)

2010-10-08T05:36:00.000-07:00

Sa pagpikit ng aking mga mata
Larawan mo ang laging nakikita
Mukha mong tila nagpapaalala
Sa panahong ating pinagsama.

Gabi gabi tila ikaw ay kapiling
Halos wala na akong mahiling
Regalo mo sa aking singsing
Laging mata duo’y nakatingin.

Matamis mong pagsinta
Ang sa akin ay nagpapasaya
Mga pangakong kayganda
Tila hindi na matatapos pa.

Ngunit dumating ang panahon
Parang isda na sa tubig ay umahon
Tulad ng pakong naalis sa pagkakabaon
Saan kaya tayo dadalin ng pagkakataon?

Kayhirap ng ganitong malayo ka na
Hindi na kailanman makakasama pa
Alaala na lang sa tuwina
Sa panaginip na lang hihintayin ka…

Babae sa Tabing-Dagat

2010-10-06T02:30:00.000-07:00

Kahapon lang kay saya mong pagmasdan
Sa akin pa ay bumati at ikaw ay kumaway
Kay ganda ng iyong ngiti ng aking masilayan
Ngiti na mananatili sa gunita ko nakatunghay

Nitong umaga, binati kita't ako ay kumaway
Humarap ka sa akin, mga mata mo ay luhaan
May hawak kang liham na basa sa luha sa kamay
Ginusto kong lapitan ka at ng aking madamayan

Kinagabihan ikaw ay nasa inyong beranda
Mag-isang nakaupo, sa malayo nakatingin
Siguro'y naghihintay sa pagdating ng iyong sinta
Pero walang dumating hanggang sa ikaw ay antukin

Sumunod na umaga, di na kita matagpuan
Hinagilap kita, naghanap kung saan saan
Sa tabing-dagat ikaw ay aking nasumpungan
Ang kabilang ibayo nais mong mapuntahan

Sapat na ang aking nasaksihan, di na kayang tikisin
Wala na akong alintana, sasabog na aking dibdib
Tumakbo ako ng mabilis, mula sa likuran ika'y kinabig
At kapwa lumuluhang lumuhod sa mainit na buhangin.

Siya na Aking Ina

2010-10-04T05:24:00.000-07:00

Siya na nagluwal sa akin
Na umantabay sa aking kamusmusan
Siya na nagmahal sa akin
Ng wagas at walang alinlangan

Siya na nagbigay buhay sa akin
Handang ialay buo niyang sarili
Siya na palaging nakabantay sa akin
Na nagpakasakit sa aking paglaki

Siya na naghihintay sa akin
Sa gabi, sa alanganing oras na pag-uwi
Siya na nagbibigay lakas sa akin
Sa tuwing ako’y malapit ng magapi

Siya na naniniwala sa akin
Kahit ako’y tinatalikuran ng lahat
Siya ang nag-aalalay sa akin
Kapag nadadapa’t nakakalimot

Siya ang nagsilbing tala
Sa panahon na madilim
Siya ang aking mahal na ina
Na naging huwaran sa akin

Puna

2010-10-04T03:44:00.000-07:00

Wala ni isa mang nabubuhay sa mundong ito na malinis, kaya bago mo punahin ang dungis ng iba, humarap ka muna sa salamin. Di na magandang tingnan ang natuyo mong muta sa mata. Maghilamos ka nga!

Huwag mong sabihin na ginawa mo ng lahat sabay taas ng dalawang kamay. Dahil kung nasubukan mo ng lahat disin sana'y wala na yang buhok mo sa kili-kili.

Lumipad at Mangarap

2010-10-03T13:35:00.000-07:00

Daan tungo sa tagumpay ay lubhang matarik
At marami ang sa iyo ay pilit na hahatak
Huwag mawalan ng pag-asa, huwag iiyak
Mahal mo sa buhay pataas ika'y itutulak

Linangin mo ang taglay na kakayanan
Gaya ng mamahaling bato at hiyas
Na kailangang kiskisin para kuminang
Di magtatagal at ikaw ay papaitaas

Huwag sumuko, huwag itigil ang laban
Tagumpay ay halos abot mo na
Pumailanglang, panatilihin ang Lipad

Sabi nga nila tiyaga ang kailangan
Haluhan mo ng sipag at dalangin
Mga pagdududa ay dapat lupigin
Makakamit ang magandang hangarin

May mga panahong walang kasing hirap
Pero sino ang nagsabing ang buhay ay madali?
Pintuan ay bukas, maging maagap
Dahil sa kabila nito'y kaligayahang di malilip

Huwag sumuko, huwag itigil ang laban
Tagumpay ay halos abot mo na
Pumailanglang, panatilihin ang Lipad

Kapag ang iyong mga pangarap ay napakasamay na
Huwag kailanman kalimutang lumingon
Ikaw naman ang sa iba ay luminga
Tulangan mo ang iba sa kanilang pagbangon

Ngayon na nasa rurok ka na ng tagumpay
Kayakap ang pantasyang iyong pinangarap
Manatili ka sanang sa lupa nakatapak

Payo Lang Naman

2010-09-30T15:22:00.000-07:00

Reklamo ka ng reklamo, daig mo pa si Archie Alemania ang kilalang reklamador... "Kung di ka na masaya sa buhay mo dito, Subukan mo kaya sa kabilang buhay?"

Sa facebook Idadaan Aking Sinta

2010-07-13T08:41:00.000-07:00

Sana iyong mapansin aking sinta
"Status message" ko sa facebook
Sayo pinipilit kong maging makata
Sa bahay nagbabasa ng pocketbook

Sa iyong comment ako ay naka-abang
Pero ni “Like” hindi mo pa mapindot
Hay! Buhay para na akong mabubuwang
Aking mundo sa iyo na lang umiikot

Hintayin mo lang aking diwata
“Note” naman ang sunod kong susubukan
Baka kasi "status" ko di mo lang makita
Dahil sa dami ng iyong mga kaibigan

At kapag hindi pa rin nagbunga
“Send Message” na ang aking gagamitin
Siguro naman iyo ng mababasa
Kung sakali man, bahala na si Batman.

Dulot ng Masamang Hangin

2010-07-10T01:51:00.000-07:00

Isang gabing sobrang init
sa sakit ako ay namimilipit
pinagpapawisan ng malagkit
hawak ang tiyan ng mahigpit

Ano kaya't kay hapdi
pakiramdam ko'y di mawari
di naman ako makapanisi
kagat ko na aking daliri

Sa higaan di mapakali
bumangon ng dali-dali
sa banyo nagbaka-sakali
sana nga sakit ay mapawi

Pag-upo sa tronong puti
sa aking pagmamadali
masamang hangin sumirit
pakiramdam ko'y langit

Amfutsa! utot lang pala
ako'y pinahirapan at nagdusa

Ang Problema sa Pinoy

2010-07-09T09:01:00.000-07:00

masyado tayong pinagpala sa karunungan..
walang aamin ng mali
walang susunod sa batas
kasi kayang lusutan
gawin mo ito, may mali
gawin mo iyon, may mali pa rin
pero sa sarili di maamin ang kamalian
nailuklok si "Totoy" sa pwesto
sasabihin di deserving
kasi walang diploma
bakit ko siya susuportahan
nailuklok si "Neneng"
sasabihin sobrang dunong
magpapayaman lang yan.
kapag baha isisi sa gobyerno
pero pagtapon ng basura sa estero
kagagawan mo naman.
Sasabihin Taxpayer ako
wala namang TIN no. pati ng sedula
aktibista puna ng puna
kakulangan naman di mapunan
kapag pulis namatay walang karapatan
kapag kriminal napatay human rights violations
lahat ng pulitiko sawsaw
Tindero may daya ang timbangan
bumibili dala ay huwad na pera
mga adik satin may bago ng bansag
Social user lang daw sabi ng ama
Dating pangulo ngayon nasa kongreso
Pinatalsik na pangulo muntik ulit manalo
at dami pa...

Tawag ng Laman

2010-07-08T18:43:00.000-07:00

Si Estong balikbayan
galing ng bansang Oman
kilalang isang mayaman
laging bida sa umpukan

Pumunta sa bayan minsan
si estong na aking kaibigan
at kanyang nasumpungan
sabungerong si Esteban

Isang mahabang kumustuhan
pero isa rin ang hantungan
sa malapit na sabungan
silang dalawa'y nagkayayaan

Doon, Estong ay may nasilayan
si Nicole, di tunay na pangalan
kagyat niyang kinindatan
babaeng pinagpala sa kagandahan

Estong kay esteban nagpaalam
meron yatang gustong ilaban
at sa paglabas ng sabungan
Nicole kanya na niyang tangan

Pagkatapos ng kainitan
at matinding bakbakan
Estong nakatulog ng tuluyan
maraming oras ang nagdaan

At sa kanyang pagmulat
siya ay nabigla't nagulat
Nicole at kanyang wallet
Di na niya mahagilap

Biglang tayo sa higaan
asawa niya dapat nyang tawagan
pero BlueBerry nya di matagpuan
Nadale siya ng reyna ng Ativan

Pano na Estong mayaman?
kwarto ay di mabayaran
Naisahan ng magandang kawatan
lugmok ka ngayon sa kahihiyan

Isang buwan ang nagdaan
si Estong balikbayan
umiiyak sa umpukan
asawa niya ay lumisan

Sa Muling Pagbangon

2010-07-07T04:39:00.000-07:00

Sa aking pansamantalang pagkariwara
Sa mundong sarili kong katha
Sana sa pagbabalik, galak at tuwa
Sa akin ay maging sagala

Sa dilim ng aking kinalagyan
Mga impit kong dalangin
Sa Kanya ko ipinarating
Mga usal kong adhikain
Sa Kanya ko na ipinalilim.

Ningas ko man ay panandaliang nanamlay
Munting baga ay nanatiling buhay
At sa aking pagnilay-nilay
Pag-aalabin muli apoy na aking taglay
Bagong Pag-asa aking pinapanday.

Sikat ng araw akin ng tanaw
Adhikain ang aking magiging gabay
Sa pamilya pangarap ay magandang buhay
Pagmamahal ang siyang tulay
Tungo sa nalalapit na tagumpay

Buhay OFW

2010-07-07T04:31:00.001-07:00

Madalas sa malayo nakatingin
Nagtatanong kung ano ang mithiin
Kalaguyo at kapiling ay dilim
Taghoy ng ulilang damdamin
Idinadaan sa buntung-hiningang malalim

Sa bawat pagpikit ng mga mata
Ala-ala ng mga iniwanang sinta
Na nakatunghay sa iyong gunita
Ang masidhing pangungulila
Kayakap mo hanggang umaga

Sa muling pagbangon, bakas ng luha
Na sa magdamag ay dumaloy sa mga mata
Pilit mong itatago para di makita
Dahil ika'y malakas sa tingin ng iba
Baon mo ay huwad na ngiti at tuwa

Sa agos ng buhay sa ibang bayan
Wala kang ibang pagpipilian
Mahirap man kailangan mong sabayan
Dahil sa balikat mo iyong pasan
Pangarap sa mga anak sa kinabukasan

Ikaw, ako, sila, tayo na nangangarap
Na sa ibayong dagat ay naghahanap
Asenso na sa sariling bayan ay mailap
Sa likod ng makapal na ulap
Tanging tanglaw ating maaapuhap.

Ang tulang ito ay unang nailthala sa OFW Chronicles

Dakilang Bayani

2010-07-07T04:24:00.000-07:00

Sa bawat daan na iyong tinahak
Sa mga luha sa mata mo pumatak
Sa katawan mong pagod at batak
Sa pamilya mong muntik mawasak

Sa bawat mga araw na lumilipas
Sa yugto ng buhay mong nalalagas
Sa damdamin mong nagagasgas
Sa mga nagdaraang mga oras

Saan ka kaya patutungo?
Sino kaya ang sa luha magpapatuyo?
May hahagod kaya sa katawang hapo?
Manitili kayang pamilya mo ay buo?

Araw na lumipas maibabalik ba?
Makikita ba mga sandaling nawala?
Kaya pa ba sa bigat ng iyong dala?
Oras na nagdaan mapapalitan ba?

Mga Bagong Bayani....Ipagbunyi inyong kadakilaan..

Ang tulang ito ay unang nailthala sa OFW Chronicles

Di Man Maging Ganap

2010-07-06T04:49:00.000-07:00

Ako ay tuliro
Di maintindihan yaring puso
Bakit ako nalilito
Kapag ika'y kausap ko

Hindi ka man abot
Dahil ika'y nasa laot
Ano man ang suot
Pag-ibig ko ika'y ibabalot

Hindi ko hinahanap
kahit ano mang pagtanggap
Tabing man ay alapaap
Maalala ka lang, saya ay ganap

Iyo sanang ipagpatawad
Kung ikaw ay aking nakaladkad
Pero ako sa iyo'y di huwad
Masamang nasa, ako'y walang hangad

Tunay kitang mahal
Kaya ika'y ilalagay sa pedestal
Huwag ka lang hahatol
Na ako sa iyo ay masahol

Alay ko ay pag-big
Di kailangan ng iyong dilig
Dahil ako mismong kakabig
Kung ito ay di mo ibig